தமிழகத்தில் அரசு பள்ளிகளில் பணிபுரியும் ஆசிரியர்கள் தகுதி தேர்வு எழுதுவது சார்ந்து ஆசிரியர்கள் மத்தியில் பல்வேறு கருத்துக்களும் முரண்பாடுகளும் ஏற்பட்டிருந்த நிலையில் அனைத்து சங்க பொறுப்பாளர்களையும் அழைத்து ஆசிரியர்களின் கருத்துக்களை கேட்க தமிழக முதலமைச்சர் அறிவுறுத்தியதின் அடிப்படையில் தமிழ்நாடு பள்ளிக்கல்வித் துறை அமைச்சர் அன்பில் மகேஷ் பொய்யாமொழி தலைமையில் கருத்து கேட்பு கூட்டம் நடைபெற்றது. இக்கூட்டத்தில் பள்ளி கல்வித்துறை இயக்குனர் கண்ணப்பன், தொடக்க கல்வித்துறை இயக்குனர் நரேஷ் ஆகியோர் முன்னிலை வகித்தனர்.கட்டாயக்கல்வி உரிமைச் சட்டம் 2009, 23 (1)ன் படி சட்டம் கொண்டுவரப்பட்டு 01-04-2010 முதல் நிறைவேற்றப்பட்டது. மேலும் இச்சட்டத்தில் உட்பிரிவு 5 ( a )ல் ஆசிரியர் தகுதி தேர்வு முடித்திருக்க வேண்டும் என்று கூறுகிறது. இந்த சட்டத்தின்படி ஒன்றிய அரசு 23-08-2010 முதல் ஆசிரியர் பணிக்கு தகுதி தேர்வு கட்டாயம் என NCTE க்கு பரிந்துரை செய்யப்பட்ட நிலையில் மாநில அரசுகள் இதனை நிறைவேற்றாமல் காலம் தாழ்த்தி வந்த நிலையில், ஒன்றிய அரசு மீண்டும் அரசாணை எண் 158 நாள் 29-07-2011 ன் படி திருத்தம் மேற்கொண்டு 06-03-2012-ல் நடைமுறைப்படுத்தியது. மேலும் 06-03-2012 க்கு முன் மத்திய அரசு கட்டுப்பாட்டில் இயங்கும் அனைத்து பள்ளிகளிலும் பணிபுரியும் ஆசிரியர்களுக்கும் தகுதி தேர்வு எழுதுவதில் இருந்து விலக்கும் அளிக்கப்பட்டது. கருத்துக் கேட்பு கூட்டத்தில் கலந்து கொண்ட அனைத்து ஆசிரியர்கள் கூட்டமைப்பின் பொதுச்செயலாளர் வீரமணி பள்ளி கல்வித்துறை அமைச்சரிடம் கோரிக்கை மனு அளித்தார். மனுவில் கூறியிருப்பதாவது: ஒன்றிய அரசு 06-03-2012 க்கு முன் ஒன்றிய பள்ளிகளில் பணிபுரியும் ஆசிரியர்களுக்கு தகுதித் தேர்வில் இருந்து விலக்கு அளித்தது போல, தமிழக அரசும் விலக்கு அளிக்க வேண்டும். அண்டை மாநிலமான கேரளா 31-03-2012 க்கு முன்னரும், கர்நாடகா 20-07- 2012 க்கு முன்னரும், பணியில் சேர்ந்த ஆசிரியர்களுக்கு தகுதித் தேர்வு எழுதுவதில் இருந்து விலக்கு அளிக்கப்பட்டது போல, தமிழக அரசும் ஒன்றிய அரசு அறிவித்த தேதியான 06-03-2012 க்கு முன் பணியில் சேர்ந்த ஆசிரியர்களுக்கு தகுதித் தேர்வு எழுதுவதில் இருந்து விலக்கு அளிக்க வேண்டும்.மருத்துவத்துறையில் முதுகலை மருத்துவ பணிக்கு நீட் தேர்வுக்கு வெயிட்டேஜ் மதிபெண்கள் வழங்குவது போல, பல ஆண்டுகள் பணிபுரிந்து அனுபவம் வாய்ந்த ஆசிரியர்களுக்கும் பணிபுரிந்த வருடத்திற்கு ஏற்ப வெயிட்டேஜ் மதிப்பெண்கள் வழங்க வேண்டும். மாற்றுத்திறனாளி ஆசிரியர்களுக்கு தகுதி தேர்வில் இருந்து முழுவதும் விலக்கு அளிக்க வேண்டும்.டிசம்பர் மாதம் நடைபெறும் நாடாளுமன்ற குளிர்கால கூட்டத் தொடரில் இரு அவைகளிலும் நமது நாடாளுமன்ற உறுப்பினர்களை பேச வைத்து தகுதி தேர்வில் நிரந்தரமாக எந்த ஒரு ஆசிரியரும் பாதிக்காத வண்ணம் ஆசிரியர் தகுதித் தேர்வில் திருத்தம் செய்து புதிய சட்டத்தை நிறைவேற்ற வேண்டும். 10 மற்றும் 12 ஆம் வகுப்பு மாணவர்களுக்கு தேர்வு நெருங்குவதாலும், அதனைத் தொடர்ந்து தேர்தல் வர இருப்பதாலும் அதுவரை நீட் தேர்வு எழுதுவது சார்ந்து எந்த அறிவிப்பும் வெளியிடாமல் நிறுத்தி வைக்க வேண்டும் மேற்கண்ட கோரிக்கைகளை நிறைவேற்றி தர வேண்டும் இவ்வாறு மனுவில் கூறப்பட்டுள்ளது.